2025-ci ilin sonuna kimi Rusiyada ciddi iqtisadi problemlər gözlənilir.

Axar.az xəbər verir ki, bunu Ukrayna Xarici Kəşfiyyat Xidmətinin rəhbəri Oleq İvaşenko deyib.

Onun sözlərinə görə, Rusiya Ukrayna və keçmiş SSRİ ölkələri üzərində tam nəzarət məqsədini saxlayır, lakin onun resursları tükənib:

“Rusiya Milli Rifah Fondu 150 milyard dollardan 38 milyard dollara qədər azalıb, qızıl və yuan ehtiyatları əriyir, 3 ayda 5 milyard dollar hərbi ehtiyaclara xərclənib. Rusiya Donetsk, Luqansk, Zaporojye və Xerson vilayətlərini ələ keçirib, Ukraynanın şimalında təhlükəsizlik zonası yaratmağa çalışır, lakin buna gücü çatmır”.

İvaşenko bildirib ki, Rusiyanın səfərbərlik resursu təxminən 25 milyon nəfərdir:

“Bunlar hərbi və ya əlaqəli ixtisasları olan vətəndaşlardır. Lakin faktiki olaraq döyüş əməliyyatlarına hazır olanların sayı 3 milyondan çox deyil. Və tammiqyaslı işğalın başlanğıcından bəri 1,3 milyon rusiyalı artıq səfərbər edilib”.