Rusiya ilə əməkdaşlıq sayəsində Şimali Koreya son 30 ildə yalnız tədricən zəifləyən ordusunu sürətlə modernləşdirir. Bu, Koreya yarımadasındakı kövrək sabitliyi kökündən poza bilər.

Axar.az xəbər verir ki, bu barədə “Nyu York Tayms" nəşri yazıb.

Məqalənin müəllifləri qeyd ediblər ki, son bir neçə ay ərzində Pxenyan süni intellektlə idarə olunan pilotsuz döyüş təyyarələri, qabaqcıl elektron döyüş sistemlərinə malik tanklar, səsdən sürətli raketlərlə təchiz edilən yeni esmines, hava hücumundan müdafiə sistemi və hava raketləri kimi bir sıra hərbi yeniliklərlə öyünür.

Məqalədə Cənubi Koreyanın məlumatlarına istinadən bildirilib:

“Moskva Pxenyanla Soyuq müharibə dövründən qalmış qarşılıqlı müdafiə və əməkdaşlıq müqaviləsini yeniləyib, Şimali Koreyanı təkcə yanacaq və ərzaqla deyil, həm də silahlı qüvvələrini modernləşdirmək üçün material və texnologiya ilə təmin edib”.