Ukrayna Təhlükəsizlik Xidmətinin bir sıra uğurlu xüsusi əməliyyatlarından, xüsusilə Rusiyanın strateji bombardmançılarına zərbələr endirildikdən sonra Ukrayna tərəfi sübut etdi ki, müttəfiqlərlə koordinasiya etmədən də düşmənin dərin arxa cəbhəsinə güclü zərbələr endirmək qabiliyyətinə malikdir. Buna görə də ABŞ Prezidenti Donald Tramp hələlik bu xüsusi əməliyyat barədə şərh vermir.

Axar.az xəbər verir ki, bunu ukraynalı hərbi ekspert Pavel Narojnı deyib.

Onun sözlərinə görə, Ukrayna dünyada ilk dəfə olaraq qırıcı təyyarə və gəmilərin məhv edilməsi üçün dəniz dronlarından effektiv şəkildə istifadə etdiyini nümayiş etdirib. Eyni zamanda, FPV dron vasitəsilə strateji bombardmançını sıradan çıxarmağa nail olub. Müdafiə Qüvvələri həmçinin uzaq məsafədən Tu-22M3 təyyarələrini vurub, yüzlərlə kilometr dərinliyə düşmən ərazisinə reydlər təşkil ediblər:

"Rusiyanın ərazisində 500 kilometr məsafəni piyada qət edən DRQ (diversiya-kəşfiyyat qrupu – red.) var idi və onlar bir Tu-22M3 təyyarəsini yandırmağa, digərini isə zədələməyə nail oldular. Bu dəfə isə 41 strateji aviasiya təyyarəsini ya zədələmək, ya da məhv etmək mümkün olub. Ukrayna təsdiqləyir ki, düşmən ərazisinin dərinliklərinə müttəfiqlərin hərəkətləri ilə koordinasiya olunmadan güclü zərbələr endirmək qabiliyyətinə malikdir".

Qeyd edək ki, Ukraynanın 1 iyun əməliyyatı nəticəsində Rusiyanın 4 aerodromunda ümumilikdə 41 hərbi təyyarə məhv edilib.