ABŞ Daxili Təhlükəsizlik Departamenti yüz minlərlə miqrantın ölkədə yaşamaq və işləmək icazələrini ləğv edəcək.

Axar.az xəbər verir ki, bu barədə CNN məlumat yayıb.

Məlumata görə, miqrantlara ölkəni tərk etmələri barədə məlumat veriləcək.

Kuba, Haiti, Nikaraqua və Venesuela vətəndaşları keçmiş prezident Co Bayden administrasiyasının başlatdığı humanitar proqram çərçivəsində ABŞ-a daxil olublar. Ümumilikdə CHNV kimi tanınan proqram çərçivəsində 530 mindən çox insan ABŞ-a axın edib.

Proqram iştirakçılarının elektron poçt ünvanlarına göndərilən sənəddə deyilir:

"Biz bununla sizə humanitar giriş icazənizin ləğv edildiyi barədə məlumat veririk. Əgər ölkəni tərk etməsəniz, şəxsi işlərinizi həll etmək imkanı olmadan həbs və deportasiya da daxil olmaqla, məcburi tədbirlərə məruz qala bilərsiniz".

CNN qeyd edir ki, qərar Donald Tramp administrasiyasının həm ölkədəki, həm də qanuni yolla gələn milyonlarla miqrantı zorla deportasiya etmək məqsədi daşıyan daha geniş immiqrasiya siyasətinin bir hissəsidir.