Ermənistanın xarici işlər naziri Ararat Mirzoyan faktiki olaraq rusiyalı həmkarını İrəvanın daxili işlərinə qarışmaqda ittiham edib.

Axar.az xəbər verir ki, bu barədə Mirzoyan Rusiya XİN rəhbəri Sergey Lavrovun Erməni Apostol Kilsəsinə hücumlarla bağlı bəyanatına cavab verərkən deyib.

Mirzoyan bildirib ki, Lavrovun məlumatı natamam və yanlışdır:

“Səhv etmirəmsə, cənab Lavrov “hakimiyyətin kilsəyə qarşı mübarizəsi” ifadəsini işlədib. Amma Ermənistanda hakimiyyətlə kilsə arasında mübarizə yoxdur. Cənab Lavrovun nəzərdə tutduqları yəqin ki, bəzi kilsə xadimlərinin Ermənistandakı siyasi proseslərdə iştirakı və müdaxiləsi ilə bağlıdır, hüquq-mühafizə orqanlarına görə, bu, dövlət çevrilişinə cəhddir. Bu, hüquqi prosesdir və Ermənistanın daxili işidir”, - o bildirib.

Qeyd edək ki, Rusiya XİN rəhbəri Sergey Lavrov İrəvanı Erməni Apostol Kilsəsinə hücumda günahlandırmışdı.