Məşhur rəssam Vinsent Van Qoqun itirdiyi güman edilən və Toqatda polis tərəfindən ələ keçirilən tablosunu Van Qoq muzeyi geri istəyir.

Axar.az xəbər verir ki, Toqat polis rəisi Fikri Yalman Van Qoqa aid olduğu güman edilən tabloyla bağlı açıqlama verib.

O, Van Qoqun "Yetim kişi" adlı əsərləri arasında yer alan "Van Qoq dəyənəklə" adlı əsərinin hazırda Toqat Məhkəməsində olduğunu deyib.

Hollandiyanın Van Qoq muzeyi ilə yazışdıqlarını deyən müdir Yalman "Bizdən ən son bunun rentgen neqativini istədilər. Göndərdik. Dedilər ki, bu neqativdən əsərin orijinal olub-olmamasını anlamaq mümkün deyil. Sonra tablonu göndərməyimizi istədilər. Ancaq əməkdaşlarımız tablonu ədliyyəyə təhvil verdi. Bundan sonrakı iş artıq Ədliyyə Nazirliyi və Toqat məhkəməsinin üzərinə düşür", – deyib.

Qeyd edək ki, tablo bir müddət əvvəl tapılıb. Onun həqiqi olub-olmadığını bilmək üçün araşdırmaların bir neçə il çəkəcəyi bildirilib.