Hazırda qrip və kəskin respirator virus infeksiyaları ilə əlaqədar epidemioloji vəziyyət stabil və nəzarətolunandır.

Axar.az xəbər verir ki, bunu APA-ya Səhiyyə Nazirliyinin mütəxəssis-eksperti, infeksionist Təyyar Eyvazov deyib.

O bildirib ki, fəsil dəyişkənliyi və zəifləyən immunitet fonunda uşaqlar arasında hava-damcı infeksiyalarının yayılması artıb:

“Fəsil dəyişməsi, havaların qeyri-stabil keçməsi, insanlarda mövsümi olaraq immunitetin nisbətən zəifləməsi uşaqlar arasında, xüsusən bağça və məktəblərdə hava-damcı üsulu ilə yayılan bu tip infeksiyaların artması üçün əlverişli şərait yaradır. Lakin bu artımlar əhəmiyyətli dərəcədə deyil və təhlükəli hesab olunmur. Tezliklə havaların stabilləşməsi və temperaturunun artması qeyd olunan infeksiyaların yayılma səviyyəsinin azalacağını deməyə əsas verir. Bu infeksiyalar qısamüddətli olub immun sistemi normal olan insanlarda heç bir problem yaratmır. Lakin müxtəlif səbəblərdən immun defisiti olan şəxslər istisnadır, həmin insanlarda yüngül gedişli kəskin respirator virus infeksiyaları fəsadlı gedişlə müşayət oluna bilər".

O qeyd edib ki, Səhiyyə Nazirliyi tərəfindən vəziyyətin stabilliyi nəzərə alınaraq heç bir məhdudlaşdırıcı tədbirlər görülmür:

“Yalnız insanların çox sayda toplandığı məkanlarda maskadan istifadə olunması tövsiyə olunur”.