Ötən il ilə müqayisədə yol-nəqliyyat və fövqəladə hadisələrin sayında 7 faiz, xəsarət alanların sayında isə 3 faiz artım olub. Regionlarda aparılmış cərrahiyyə əməliyyatlarının sayı ötən il ilə müqayisədə 4 dəfə artıb. Analoji göstərici 2016-cı ildə 9, 2017-ci ildə isə 36 təşkil edib.

Axar.az xəbər verir ki, bu sözləri Səhiyyə Nazirliyinin Təcili və Təxirəsalınmaz Tibbi Yardım Stansiyasının baş həkimi Mirələm Cəlalov ilin yekunları ilə bağlı danışarkən deyib.

Onun sözlərinə görə, 2017-ci il ərzində Stansiya 2590 nəfərə xidmət göstərib. Məntəqələrdə yol-nəqliyyat və digər fövqəladə hallarla bağlı 1022 hadisə zamanı 1736 pasientə tibbi yardım edilib və onlardan 70 faizi hospitalizasiya olunub:

“2017-ci il ərzində Təcili Təxirəsalınmaz Tibbi Yardım Stansiyasına kritik vəziyyətdə olan 92 hamilə və zahıya dair 183 dəfə çağırış edilib. Onlardan 32-si Bakıya və digər rayonlara köçürülüb, 24 nəfərə isə telesəhiyyə vasitəsilə məsləhət verilib. Bundan başqa, ötən il ölkəmizdə ilk dəfə təcili və təxirəsalınmaz tibbi xidmətdə telesəhiyyə texnologiyalarının tətbiqi ilə məsafədən videobağlantı vasitəsilə konsultasiyalar həyata keçirilib”.