17 yaşlı Sevinc Əliyevanın yaşaması üçün dəstəyinizə ehtiyacı var.

Axar.az xəbər verir ki, bu barədə Sevincin anası Raifə Əliyeva məlumat yayıb.

O bildirib ki, ürək xəstəliyindən əziyyət çəkən Sevincin əməliyyat olunması üçün 170 min manat pul tələb olunur. Onun sözlərinə görə, Sevincin müalicəsi Belarusiya Kardiologiya İnstitutunda mümkündür, lakin əməliyyat üçün 100 min ABŞ dolları (170 min AZN) tələb olunur:

“Pul toplanmadıqca və İnstitutun bank hesabına köçürülmədikcə Belarusiya Kardiologiya İnstitutu xəstəni müayinəyə belə qəbul edə bilmir. İndiyə qədər lazım olan məbləğdən sadəcə 30 min manatını toplaya bilmişik. Əminik ki, Azərbaycanda yüzlərlə humanist, ürəyigeniş, yardımsevər insan bizim səsimizi eşitsə, öz dəstəklərini əsirgəməyəcək”.

R.Əliyeva Sevincin əkiz bacısı Səadətin də eyni xəstəlikdən vəfat etdiyini desə də, Sevincin əməliyyat nəticəsində sağala biləcəyini söyləyib.