Adı dəfələrlə qalmaqallarda hallanan Ucar Mərkəzi Rayon Xəstəxanasının cərrahı Cavanşir Qədirovla bağlı daha bir rüşvətxorluq iddiası ortaya atılıb.

C.Qədirovun hədələrindən cana gəldiyini bildirən Ucar rayon sakini Purqafari Azər Ələsgər oğlu bu barədə özü Axar.az-a məlumat verib.

Həkimin cərrahi əməliyyat qarşılığında rüşvət tələb etdiyini iddia edən xəstələrdən biri olan A.Purqafari qeyd edib ki, C.Qədirovun belə qanunsuz əməllərindən bütün rayon cana doyub.

Şikayətçi məktubunda yazıb ki, həkimin ondan tələb etdiyi pulu vermədiyi üçün hədələnir:

"Həyat yoldaşım 23 yanvar 2015-ci il tarixdə qeysəriyyə əməliyyatı ilə uşaq dünyaya gətirib. Əməliyyatı cərrah Cavanşir Qədirov həyata keçirib. Yoldaşımın müalicəsi üçün 5 gün ərzində mənə aldırdığı dərmanların dəyəri 1500 manatdan çox oldu. Hələ üstəlik məndən əməliyyat üçün 450 manat pul verməyi də tələb edirdi. Mənim buna imkanım çatmır. Həm dövlət xəstəxanalarında bütün əməliyyatlar pulsuzdursa, niyə axı pul ödəməliyəm?! Dəfələrlə pul istəməsinə baxmayaraq, imkanım olmadı verməyə. Məni, ailəmi evə buraxmayıb girov saxlayacağı ilə hədələdi".

Çıxılmaz vəziyyətdə qalan şikayətçi qeyd edib ki, həkim xəstəxanada olmadığı vaxt xanımını bir tibb bacısının köməyi ilə evə apara bilib. Elə əsas problem də bundan sonra başlayıb:

"Həkimin tələb etdiyi pulu ödəmədən yoldaşımı evə gətirdiyim üçün Cavanşir Qədimov xəstəxanaya gələn kimi bizim ünvanımıza nalayiq sözlər deyib. Nəyin bahasına olur-olsun bizi cəzalandıracağını bildirib".

Şikayətçi qeyd edib ki, cərrahın ondan 450 manat tələb etməsini sübut edəcək video çəkiliş də var. O, bununla bağlı əlində olan bütün faktları hüquq mühafizə orqanlarına, o cümlədən də Səhiyyə naziri Oktay Şirəliyevə təqdim edəcəyini bildirib.

A.Purqafari məsələ ilə bağlı aidiyyəti qurumlara və Səhiyyə Nazirliyinə müraciət də edib.

Qeyd edək ki, cərrah Cavanşir Qədirovla bağlı mətbuatda dəfələrlə belə şikayətlər işıqlandırılıb. Ötən ilin dekabrın 25-də qeysəriyyə əməliyyatı ilə uşaq dünyaya gətirmiş ananı onlardan tələb etdiyi iddia edilən 400 manatı verə bilmədikləri üçün evə buraxmırdı.

Bundan başqa, 2014-cü ilin aprel ayında sözügedən xəstəxanada xəstədən pul tələb edən C. Qədirov əməliyyat etdiyi 19 yaşlı qadın uşaq dünyaya gətirdikdən sonra ölmüşdü. Həkim qadının təbii doğuşla azad ola bilməyəcəyini deyərək, qeysəriyyə əməliyyatını məsləhət bilmişdi. Ölüm faktı ilə əlaqədar xəstəxanadan bildirmişdilər ki, ananın vəziyyəti qeysəriyyə əməliyyatından sonra yaxşı olub. Lakin əməliyyatdan sonra o, ayağa durmaq istəyəndə yıxılaraq başını möhkəm əzib, komaya düşüb və komadan ayılmayıb.

Məsələ ilə əlaqədar Səhiyyə Nazirliyinin mətbuat xidmətinin əməkdaşı Səfayə Əhmədova Axar.az-a açıqlamasında Cavanşir Qədirovla bağlı onlara heç bir müraciət daxil olmadığını bildirib. S.Əhmədova qeyd edib ki, bu həmin həkimlə bağlı şayiə də ola bilər:

"Onunla bağlı heç bir şikayət daxil olmadığı üçün bir söz deyə bilmərəm. Ola bilər ki, kimlərsə həmin həkimlə bağlı şayiə yayır. Təbii ki, araşdırılmadan bir söz deyə bilmərik. Məsələ araşdırıldıqdan sonra sizə məlumat veriləcək".