"Səhiyyə Nazirliyinin apardığı araşdırma yekunlaşıb. Araşdırmanın nəticəsinə uyğun olaraq nazirlik ölkədə apteklərdə satılan "AzərFarm" LTD şirkətinin istehsal etdiyi "Kalsium xlorid" dərmanının satışına və istifadəsinə qadağa qoyub".

Bu sözləri Səhiyyə Nazirliyinin mətbuat xidmətinin rəhbəri Anar Qədirli Axar.az-ın sözügedən dərman şirkətinin istehsal etdiyi "Pereqidrol" (30%) və "Kalsium xlorid" dərmanlarının etiketinin yalnış vurulması ilə bağlı xəbəriylə əlaqədar aparılan araşdırmanın nəticəsi barədə danışarkən bildirib.

Onun sözlərinə görə, dərmanların əczaçılıq şəbəkəsindən yığılması təmin edilib:

"AzərFarm" LTD şirkəti tərəfindən Səhiyyə Nazirliyinin Analitik Ekspertiza Mərkəzinə daxil olan məktubda şirkətin istehsal etdiyi 036 seriyalı istifadə müddəti 01.2017-ci ilədək olan "Kalsium xlorid" 5% 100 ml məhlul dərman vasitəsinin istehsalı zamanı bəzi texniki problemlərin olması ilə bağlı həmin seriyanın satışının dayandırılması və 036 seriyalı "Kalsium xlorid" 5% 100 ml məhlul dərman vasitəsinin aptek şəbəkəsindən geri qaytarılmasına köməklik göstərilməsi barədə müraciət olunub. Səhiyyə Nazirliyinin Analitik Ekspertiza Mərkəzinə daxil olmuş məlumat əsasında müvafiq sərəncamla "AzərFarm" LTD şirkətinin istehsal etdiyi adı çəkilən dərman vasitəsinin satışına və istifadəsinə müvafiq araşdırma aparılana qədər qadağa qoyub və əczaçılıq şəbəkəsindən yığılmasını tam təmin edib".

Xatırladaq ki, dünən Axar.az "AzərFarm" LTD şirkətinin "Peregidrol" (30 faizlik) və "Kalsium xlorid" dərmanlarının etiketini yanlış vurması ilə bağlı xəbər yaymışdı.