Dünyanın məşhur DJ-i Willy William və Tricky Gullivan Bakının qonağı olacaq.

Musavat.com saytına bu haqda prodüser Təranə Səmədova məlumat verib: "Oktyabr ayının 22-də Elektra Hall-da böyük izdiham yaşanacaq. Məşhur DJ ölkəmizin qonağı olacaq. O təşkilatçı Samir Xəttabın dəvəti ilə Bakıda çıxış edəcək. Willy sevənləri üçün sevilən mahnılarını səsləndirəcək. Gecənin qonağı azərbaycanlı DJ Roşka olacaq".

Maraqlı konsert vəd edən təşkilatçı Samir Xəttab isə müğənninin alacağı qonorarı gizli saxlayıb: "Maraqlı konsert olacaq, qonaqlar əyləncəli anlar yaşayacaq. Konsertin biletləri baha deyil, 26-50 manat arasındadır. Amma ola bilsin ki, konsertə 20 gün qalmış bahalaşsın.

Müğənninin alacağı qonorara gəldikdə isə onu deyə bilmərəm. Kommersiya sirridir".

Qeyd edək ki, S. Xəttab bir müddət öncə amerikan müğənni və təşkilatçı, səhnə adı Şaqqi ilə tanınan Orvill Riçard Burrelli Azərbaycana gətirmək istəmişdi. Lakin Şaqqi Azərbaycana 100 min dollara gələ biləcəyini dediyi üçün konsert layihəsitəxirə salınmışdı.