Ana səhifə Siyasət |
Millət vəkili Qənirə Paşayeva və araşdırmaçı-yazar İmdat Avşarın tərtib etdikləri “Qarabağ hekayələri”nin təqdimat və imzalanma mərasimi İspartada böyük maraqla qarşılanıb.
Axar.az xəbər verir ki, tədbirdə iştirak edən valilik, bələdiyyə rəsmiləri, universitet müəllimləri, ziyalılar və gənclər kitabın önəmi ilə bağlı fikirlərini bölüşüblər.
Millət vəkili “Qarabağ hekayələri”ni hazırlamaqda əsas məqsədinin Türkiyə və ondan kənarda yaşayan türk diaspor təşkilatlarına Qarabağ həqiqətləri ilə bağlı daha geniş bilgi vermək olduğunu bildirib. Ermənistanın mülki azərbaycanlılara qarşı törətdiyi cinayətlərdən danışan Q.Paşayeva beynəlxalq təşkilatların ikili standart və ədalətsizliklərini diqqətə çatdırıb:
“Təəssüf ki, BMT Təhlükəsizlik Şurası, AŞPA və digər beynəlxalq təşkilatlar özlərinin qəbul etdiyi qətnamələrin yerinə yetirilməsi istiqamətində Ermənistana heç bir təzyiq göstərmirlər. Ermənistan ön cəbhədə mülki azərbaycanlılara qarşı cinayətlər həyata keçirir, onları hədəfə alır, qətlə yetirir, yaralayır, evlərini dağıdır. Bu cür insanlıqdan kənar əməllər, cinayətlər Ermənistanın xislətinə xasdır, amma Azərbaycan və ordumuz artıq 20 il əvvəlki deyil, işğalçılar layiqli cavablarını alacaqlar.
Ümid edirik ki, kitabda yer alan bir-birindən dəyərli hekayələr Azərbaycanın haqq səsini öncə qardaş Türkiyədə və türk dünyasında, sonra da bütün dünyada əks etdirəcək”.
Qeyd edək ki, “Qarabağ hekayələri” kitabı XX əsrdə dünyanın gözləri önündə tarixin canlı olaraq qeyd etdiyi ən qanlı, ən ağır soyqırıma, qətliamlara məruz qalan, minillik ata yurdlarından didərgin salınan Azərbaycan türklərinin ağrı-acılarını əks etdirir.
Tarix
2017.03.13 / 12:24
|
Müəllif
Aygün Yusibova
|