Ana səhifə Siyasət |
İkili görüşlərimizdə iki dövlət arasındakı münasibətləri, üçlü görüşdə isə sözügedən üç dövlət arasındakı münasibətləri necə möhkəmləndirmək barədə müzakirələr apardıq. Bunun üçün kifayət qədər potensialımız var.
Axar.az xəbər verir ki, bunu Türkiyə Xarici İşlər naziri Mövlud Çavuşoğlu Bakıda Azərbaycan, Türkiyə və Türkmənistan xarici işlər nazirlərinin dördüncü üçtərəfli görüşündən sonra keçirilən mətbuat konfransında deyib.
“Azərbaycan, Türkiyə, Türkmənistan və Gürcüstan arasında əməkdaşlığı nəzərdə tutan yol xəritəsini müzakirə etdik. Əlbəttə, enerji məsələlərini də müzakirə etdik. 2018-2020-ci illəri əhatə edən yol xəritələrimiz var”, - türkiyəli nazir bildirib.
Çavuşoğlu ermənilərin açdığı atəş nəticəsində şəhid olan 2 yaşlı Zəhra ilə bağlı başsağlığı verib:
“Ermənistanı bu kimi hücumları dayandırmağa, işğal olunmuş Azərbaycan torpaqlarından çıxmağa çağırırıq. Türkiyə hər zaman Azərbaycanın yanındadır”.
Nazir 2016-cı ilin 15 iyulunda xain çevrilişə cəhd zamanı Türkiyənin yanında olduğu üçün Azərbaycana minnətdarlığını bildirib.
Tarix
2017.07.19 / 13:34
|
Müəllif
Rəfiqə Əlisəfa
|