Azərbaycan, Türkiyə və Pakistan parlament sədrlərinin ilk üçtərəfli görüşü üç ölkə arasında həqiqi qardaşlıq münasibətlərini açıq şəkildə dünyaya bəyan edir. Bakı Bəyannaməsinin imzalanması həqiqətən ikitərəfli və üçtərəfli əlaqələrin iqtisadi, siyasi, xalq diplomatiyası, mədəniyyət, təhsil və digər sahələrdə gücləndirilməsi istiqamətində atılmış nəhəng bir addımdır.

Bunu Axar.az-a açıqlamasında Azərbaycan və MDB ölkələri üzrə pakistanlı mütəxəssis dr. Mahmud Həsən deyib.

Ekspertin sözlərinə görə, bölgədə və dünyada geosiyasi və geostrateji proseslər çox dinamik şəkildə dəyişir. Bakı Bəyannaməsi bütün bu dəyişikliklərə, eyni zamanda bölgədə müxtəlif ssenarilər üzərində işləyən güclərə adekvat cavabın verilməsində böyük önəmə sahibdir:

“Dünyada və bölgədə geosiyasi və geostrateji durumun çox sürətlə dəyişməsinin şahidi oluruq. Əlbəttə, müxtəlif güclər bütün bu proseslərdən faydalanmaq üçün fərqli ssenariləri səhnələşdirməyə çalışır. Beləliklə, gedən dəyişikliklərə və edilən həmlələrə qarşı təcili və adekvat cavab vermək, addımlar atmaq ehtiyacı yaranır. Bu baxımdan Azərbaycan, Türkiyə və Pakistan parlament sədrlərinin üçtərəfli görüşü doğru zamanda doğru istiqamətdə, doğru bir addım kimi görünür. Ümid edirəm ki, Bakı Bəyannaməsi üçtərəfli münasibətlərin institutlaşması baxımından da mühüm rol oynayacaq”.