ABŞ və Ermənistan arasında ötən gün Vaşinqtonda imzalanan strateji tərəfdaşlıq haqqında xartiyadan sonra rəsmi İrəvanın xüsusilə Rusiyaya qarşı daha cəsarətli davrandığı bildirilib.

Axar.az xəbər verir ki, bu barədə erməni mediası yazıb.

Buna misal olaraq “Rossiya” telekanalında yayımlanan “Vesti nedeli” proqramının 12 yanvar 2025-ci il tarixli buraxılışında guya Ermənistanın suverenliyi və ərazi bütövlüyünə qarşı yönələn fikirlərlə bağlı Rusiya səfiri Kopırkinin XİN-ə dəvət olunması və Rusiyaya nota verilməsi göstərilib. Eyni zamanda Ermənistan-ABŞ tərəfdaşlıq xartiyasına Rusiya səfirliyinin mövqeyi də diqqət çəkib. Belə ki, Rusiyanın Ermənistandakı səfirliyi bəyanatında bu məsələyə neytral qaldıqlarını bildirib.

Yeri gəlmişkən, rusiyalı politoloqlardan fərqli olaraq, Kreml sözçüsü Dmitri Peskov da Ermənistanın ABŞ-la strateji tərəfdaşlıq xartiyası imzalamasını “İrəvanın suveren hüququ” olaraq dəyərləndirib.

Erməni politoloq Yervand Bozoyanın fikrincə, bütün bu proseslər Ermənistanı Türkiyənin təsir dairəsinə yaxınlaşdırır. Onun iddiasına görə, Ermənistanda qərbyönlü olmaq türkiyəyönlü olmaq deməkdir.

Ermənistanın Avropa və ABŞ-la sərhədinin olmaması, ABŞ-ın regional siyasətini NATO müttəfiqi Türkiyə vasitəsilə həyata keçirməsi, o cümlədən Ermənistanın “Avropa qapısının” Türkiyə olması Bozoyanı bu fikrə gətirib.

O ki qaldı Rusiyanın susmasına, Bozoyan iddia edib ki, Kreml baş verənlərdən və erməni xalqının reaksiyasından “şokdadır”. Çünki “əslində Paşinyan bütöv bir xalqı Türkiyənin təsiri altına salmağa çalışır, amma Ermənistanda heç bir ciddi siyasətçi baş verənlərə reaksiya vermir”.