Bu gün Azərbaycan kinosunun unudulmaz simalarından olan Lütfəli Abdullayevin anım günüdür.

Axar.az xatırladır ki, Lütfəli Abdullayev 1914-cü il martın 22-də Şəki şəhərində anadan olub. 1928-ci ilin sentyabrında Bakıya gələn Lütfəli Abdullayev Dövlət Konservatoriyasının valtorna sinfinin məşğələlərində iştirak edib. 1956-cı ildə isə Azərbaycan Dövlət Musiqili Komediya Teatrında fəaliyyətə başlayıb.

Aktyor teatrın aparıcı sənətkarı kimi, demək olar, ən populyar, uğurlu və uzunömürlü tamaşalarda çıxış edib. Onun yaradıcılığını üç bölümə ayırmaq olar:

1. Klassik operettalarda oynadığı rollar

2. Tərcümə əsərlərində ifa etdiyi səhnə surətləri

3. Çağdaş bəstəkarların musiqili komediyalarında yaratdığı koloritli personajlar.

"Əhməd haradadır?" (Zülümov), "Ulduz" (Məhəmməd), "Qəribə əhvalat" (Kefçilov), "İmportnı" yaxud "Zırrama" kimi filmlərdə yaddaşlara həkk olunan obrazlar yaradan Lütfəli Abdullayev qızlarına onun sənətini davam etdirərlərsə, qəbirdən qalxıb onları öldürəcəyini deyib. Buna görə də qızı Gülnarə rejissor, Xurşud isə Azərbaycanda ilk klavişin ifaçısı olub.

Görkəmli aktyor ölümündən bir neçə saat əvvəl aktyor dostlarına zəng vurub vidalaşıb, həmyerlisi, xalq şairi Bəxtiyar Vahabzadə ilə də yarızarafat, yarıciddi söhbətləşib:

- Bəxtiyar, ölürəm, gedirəm o dünyaya, dədənə sözün varsa, de.

- Gedirsənsə, dədəmə de ki, mənə nə çatacaqsa, sənə versin.

- Yox e, verməz, tanıyıram, sənin dədən simicin biridir. Elə bilər ki, mən sənə çatdırmayacağam.

Xalq artisti, ölməz sənətkar Lütfəli Abdullayev 1973-cü il 9 dekabr tarixində Bakı şəhərində vəfat edib.