Bakı şəhərinin baş planına uyğun olaraq Yasamal rayonu ərazisində aparılan söküntü və abadlıq işləri tarixi binalardan da yan keçməyib. Bu binalardan biri də Azərbaycan Dövlət YUĞ teatrının yerləşdiyi tarixi-memorial tikilidir. Qeyd edək ki, bina XVIII əsrə aiddir və bura o vaxtlar hamam olub.

Mədəniyyət və Turizm Nazirliyinin YUĞ a dəstəyindən sonra söküntü işləri teatrın fəaliyyətinə zərbə vurmadı. Hazırda teatr üçün yeni məkan axtarılır. Lakin məsələnin bir tərəfi teatr idisə, o biri tərəfi də binanın çox gərəkli memorial abidə olmasıdır.

Moderator.az-a verilən məlumata görə Azərbaycan Milli Elmlər Akademiyasının Mədəniyyət və Memarlıq İnstitutunun Tarixi Abidələri Qoruma şöbəsi binanın sökülməsinə qol çəkməyib.

Qeyd edək ki, şəhərsalma prosesində adı çəkilən institutun rəyi mütləq alınmalıdır. Lakin elmi qurum tikilinin gərəkli memarlıq abidəsi olmasını nəzərə alaraq buna etiraz edib.

İstirahət günü olması səbəbindən məsələni dəqiqləşdirmək üçün Tarixi Abidələri Qoruma şöbəsi ilə əlaqə saxlaya bilmədik.