Əməkdar artist Almaz Ələsgərli Azərbaycan Dövlət Musiqili Teatrında fəaliyyətə başlayıb.

Teatrdan Axar.az-a verilən məlumata görə, bu yaxınlarda Almaz Ələsgərlinin baş rolu ifa edəcəyi yeni səhnə əsəri tamaşaçılara təqdim olunacaq. Məsələ ilə bağlı danışan Almaz Ələsgərli yenidən Musiqili Teatra qayıtdığı üçün xoşbəxt olduğunu bildirib:

"İlk dəfə 1985-ci ildə, tələbə ikən məhz burada - Musiqili Teatrda səhnəyə çıxmışam. Bu illər ərzində ürəyim həmişə teatrın, səhnənin yanında olub. Elə bilirdim, həyatımda nəsə çatmır. Qərar verdim ki, yenidən bu şöhrətli kollektivə qayıdım. Xeyirxah insan, əvəzsiz dost kimi tanıdığım Əliqismət müəllimə müraciət etdim. Sağ olsun, məni qəbul etdi, dinlədi və Musiqili Teatrda aktrisa kimi fəaliyyət göstərməyim üçün şərait yaratdı. Hazırda baş rollardan birini ifa etdiyim yeni tamaşanın məşqləri gedir. Burada çox gözəl yaradıcı mühit, səmimi, işgüzar kollektiv var. Yaxın zamanlarda hazırladığımız tamaşanın premyerası olacaq".