İsrailin hərəkətləri Fələstin ərazilərindən kənara çıxıb və regional ekspansionizmə çevrilib.

Axar.az Report-a istinadən xəbər verir ki, bunu Türkiyənin xarici işlər naziri Hakan Fidan Qətərin "Əl-Cəzirə" və Qətər TV-yə müsahibəsində deyib.

"Bu gün biz (Ərəb Liqası və İslam Əməkdaşlıq Təşkilatı) xarici işlər nazirlərinin iclasını keçirdik. Sabah liderlərimiz görüşəcək. Biz burada gördük ki, artıq məsələ təkcə Fələstinə və İsrailə aid deyil, bu, təkcə İsrailin Fələstini işğalı, Qəzzadakı soyqırımı problemi ilə məhdudlaşmır. Bu aspektlərlə yanaşı, hazırda məsələ İsrailin bölgədəki ekspansionizminə aiddir", - Fidan bildirib.

Onun sözlərinə görə, İsrail ekspansionizmi məsələsi aydın formalaşdırıldıqdan sonra ərəb və islam ölkələri birləşməli və bu yeni problemin həllini tapmalıdır:

"Bizim regional təhlükəsizliyimiz daha güclü institusional təməl üzərində qurulmalıdır. Regionda heç kim heç kimin təhlükəsizliyə təhdid yaratmamalıdır. Lakin İsrailin indiki aqressiv siyasəti bütünlüklə buna yönəlib. Əmin ola bilərsiniz ki, bu gün keçirdiyimiz nazirlərin görüşündə bu məsələlər geniş müzakirə olunub və sabah liderlərin görüşündə də qaldırılacaq".