10:30

Lökbatan qəsəbəsi – “28 May” metrostansiyası istiqamətində hərəkət edən “Bakı Bus”a məxsus 125 saylı marşrut avtobusuna su damıb.

Axar.az-ın verdiyi məlumata görə, nəticədə avtobusun bir neçə oturacağı islanıb və sərnişinlər üçün çətinliklər yaradıb.

Məsələ ilə bağlı “Bakı Bus”dan bildirilib ki, avtobuslardan birinin soyutma sisteminin drenaj xəttində texniki nasazlıq yaranıb.

“Bu gün “Bakı Bus” MMC-nin istismarında olan 125 nömrəli müntəzəm marşrut xətti üzrə hərəkət edən sürücü nasazlıq barədə monitorinq mərkəzinə məlumat verib. Məlumat əsasında monitorinq mərkəzi tərəfindən texniki servis əməkdaşları “28 May” Nəqliyyat Mübadilə Mərkəzinə göndərilib və nasazlıq dərhal aradan qaldırılıb. Avtobusun fəaliyyəti qısa müddət ərzində bərpa olunub.

Baş vermiş müvəqqəti narahatlığa görə sərnişinlərdən üzr istəyirik”, - açıqlamada qeyd olunub.