2025-ci ilin İş Planına əsasən Hesablama Palatasının apardığı audit 3560 satınalmanı və 3,8 mlrd. manatı əhatə edib.

Axar.az xəbər verir ki, bu barədə Hesablama Palatasının sədri Vüqar Gülməmmədov Milli Məclisin İqtisadi siyasət, sənaye və sahibkarlıq komitəsinin iclasında - rəhbərlik etdiyi qurumun ötənilki fəaliyyəti ilə bağlı hesabatın müzakirəsi zamanı bildirib.

Palata sədri deyib ki, bu satınalmaların yarıdan çoxu (60%-i) (2119-u və ya 2 mlrd. manatdan bir qədər çoxu) müsabiqəsiz satınalma metodu ilə keçirilib. 2025-ci ildə də satınalmalar rüblər üzrə qeyri-bərabər paylanıb, xüsusilə ilin son rüblərində (III və IV rüblər) cəmləşmə müşahidə olunub:

"Təxminən 130 təşkilatın ilk satınalması 6-cı ayda, 70-dən çox təşkilatın isə ilk satınalması 9-cu ayda baş verib".

V.Gülməmmədov bağlanmış müqavilələrin tam icra olunmamasına da toxunub. Deyib ki, qurumlar tərəfindən təqdim edilmiş məlumatlar müqavilələrin 30%-nin tam icra icra olunmadığını göstərir.