Axar.az-ın əməkdaşı Gülnarə Kərimova avtobus sürücüsünün sürət həddinin aşmasının qurbanı olub.

Əməkdaşımız 176 nömrəli marşurut üzrə hərəkət edən "Toyota" markalı 10 TD 995 nömrəli avtobusla "Sədərək" Ticarət Mərkəzindən qayıdarkən, Xırdalan dairəsinə böyük sürətlə irəliləyən avtobusun qəfil əyləci basması nəticəsində müvazinətini itirib və avtobusun döşəməsinə yıxılıb. Əməkdaşımızın bildirdiyinə görə, ona yardım edən də olmayıb.

Çətinliklə də olsa, özünü 1 saylı şəhər klinik xəstəxanasına çatdıran Gülnarə Kərimovanın müayinəsi zamanı bəlli olub ki, onun bədəninin sol nahiyəsində 4-cü qabırğa, sol qolu sınıb, sol ayağında isə topuq çatlayıb. Gülnarə Kərimova gips salındıqdan sonra ambulator müalicəyə buraxılıb.

İstirahət günü olduğu üçün sürət həddini aşan və şikəst etdiyi sərnişinə heç bir yardım göstərmədən uzaqlaşan sürücünün məsuliyyətsizliyinə rəsmi münasibət öyrənə bilmədik.

Mövzunu diqqətdə saxlayacağıq.