Jurnalist Əfqan Muxtarlının barəsində həbs qətimkan tədbirinin daha iki ay uzadılması ilə bağlı Nəsimi rayon Məhkəməsinin çıxardığı qərardan verilən apelyasiya şikayətinə baxılıb.

Axar.az xəbər verir ki, bu gün Bakı Apelyasiya Məhkəməsində Əfqan Muxtarlının apelyasiya şikayəti üzrə qərar elan edilib.

Qərara görə, Əfqan Muxtarlının barəsində seçilmiş həbs qətimkan tədbirinin ləğv edilməsini barədə şikayəti təmin edilməyib.

Nəsimi rayon Məhkəməsində hakim Şəlalə Həsənovanın sədrliyi ilə baş tutan prosesdə prokurorun vəsatəti təmin edilib və Əfqan Muxtarlının həbsinin daha iki ay uzadılması barədə qərar qəbul edilib.

İttihama görə, Əfqan Muxtarlı bu il mayın 29-da saat 22.40 radələrində Balakən rayonu ərazisində Azərbaycan dövlət sərhədini qanunsuz keçdikdən sonra Dövlət Sərhəd Xidmətinin əməkdaşları tərəfindən saxlanılıb.

Ona qarşı Cinayət Məcəlləsinin 318-ci (Dövlət sərhədini qanunsuz olaraq keçmə), 206-cı (Qaçaqmalçılıq) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri üzrə ittiham irəli sürülüb.

Nəsimi rayon Məhkəməsinin qərarı ilə Əfqan Muxtarlının barəsində 3 ay müddətinə həbs qətimkan tədbiri seçilib, daha sonra isə onun həbs müddəti daha 2 ay uzadılıb.