Millət vəkili Qənirə Paşayeva Pakistanın ictimai xadimləri, tanınmış təşkilat və QHT rəhbərləri ilə görüşüb.

Axar.az xəbər verir ki, millət vəkili görüşdə Ermənistanın vandalizm aktları müzakirə edilib.

Q.Paşayeva bildirib ki, Azərbaycan xalqı Pakistanın Dağlıq Qarabağ münaqişəsinin tənzimlənməsi ilə bağlı verdiyi dəstəyi yüksək dəyərləndirir:

“Azərbaycan prezidenti və ölkənin parlamenti hər zaman dost Pakistanla münasibətlərin inkişafına böyük önəm verir. Pakistan Xocalı soyqırımını rəsmi olaraq tanıyıb və Ermənistanın insanlıq əleyhinə yönəlmiş bu vandalizm hərəkətlərini qətiyyətlə pisləyib, eləcə də işğalçı ilə diplomatik əlaqələr qurmayıb. Xalqımız dost və qardaş Pakistan dövlətinin bu addımını Azərbaycana verilən ən böyük qiymət kimi dəyərləndirir”.

Q.Paşayeva Azərbaycanın Birinci vitse-prezidenti Mehriban Əliyevanın qardaş Pakistanda həyata keçirdiyi böyük və əhəmiyyətli layihələrin xüsusi rolunu da vurğulayıb.

Millət vəkili görüşdə Dağlıq Qarabağ münaqişəsi ətrafında son vəziyyət, Ermənistanın bölgədə davam edən təxribatları barədə də geniş məlumat verib.

Pakistanın ictimai xadimləri, tanınmış təşkilat və QHT rəhbərləri yaxın zamanlarda Azərbaycana səfər edəcəklərini və bundan sonra da Azərbaycanın yanında olacaqlarını bildiriblər.