Həmin fotonu, xəbəri dərc edənləri, yayanları məhkəməyə verəcəyəm.

Bu sözləri Axar.az-a Suraxanı rayonu, Yeni Bülbülə qəsəbəsində yerləşən 316 saylı məktəbin direktoru Gülnarə Əkbərova avtomobilini şagirdlərin sırada dayanması üçün nəzərdə tutulmuş yerdə - məktəbin qarşısında park etməsi haqda yayılan xəbərlərdən danışarkən deyib.

Direktor mediaya açıqlamanı yalnız Bakı Şəhəri Təhsil İdarəsinin KİV-lə əlaqələr şöbəsinin icazə kağızından sonra cavablandıracağını bildirib.

Qeyd edək ki, bu gün sosial şəbəkələrdə və mətbuatda Suraxanı rayonu, Yeni Bülbülə qəsəbəsində yerləşən 316 saylı orta məktəbin direktoru Gülnarə Əkbərovanın avtomobilini şagirdlərin sırada dayanması üçün nəzərdə tutulmuş yerdə - məktəbin qarşısında park etməsinin fotosu yayılıb. Direktorun bu hərəkəti sosial şəbəkə istifadəçiləri tərəfindən birmənalı qarşılanmayıb və o, sərt şəkildə tənqid olunub.