İllər öncə şəhid hərbi qulluqçulara görə sığorta ödənişi ilə təmin edildiklərinə görə yenidən birfəfəluk ödəmə almaq hüququna malik olmayan kiçik bir qrup da var.

Axar.az xəbər verir ki, bu sözləri Əmək və Əhalinin Sosial Müdafiəsi naziri Sahil Babayev bu gün keçirdiyi mətbuat konfransında deyib.

“Həmin insanlar indiyə qədər heç zaman sığorta ödənişi almadıqları iddiası ilə narazılıq edirdilər. Onlar nazirlikdə rəhbər şəxslər tərəfindən qəbul olunub, şikayətlərinə baxılıb. Həmin şəxslərə vaxtı ilə ödəniş aldıqlarına dair təsdiqedici sənədlər bir daha təqdim olunub”.

Sahil Babayev eyni zamanda Qarabağ müharibəsi əlilləri və şəhid ailələrinin mənzillə təminatı proqramının icrası ilə bağlı da məlumat verib:

“Cari ilin avqust ayında Qaradağ rayonunda bu təbəqədən olan insanlara cənab Prezidentin də iştirakı ilə 35 mənzil təqdim olundu. İlin sonuna kimi şəhid ailələri və müharibə əlilləri üçün Qaradağ rayonunda 200, Zabrat qəsəbəsində 95, Mehdiabad qəsəbəsində 72 və Müşfiqabad qəsəbəsində 24 mənzil satın alınacaq. İmişlidə 54, Şamaxıda 36 mənzilin inşası başa çatdırılacaq".

Nazirin sözlərinə görə, ilin sonuna qədər bu kateqoriyadan olan insanlara ümumilikdə 583 mənzil və fərdi ev veriləcək”.