"Goranboy qatili" Rafiq Hüseynovun ailəsində baş verən dəhşətli faciə haqda sağ qalan qardaşı danışıb.

Axar.az xəbər verir ki, Faiq Hüseynov qardaşı Afiqin intiharını və atası Müzəffərin buna dözməyərək qəfil ölümünü baş verən kütləvi qətllə əlaqələndirib.

F.Hüseynov ATV-yə deyib ki, Afiq qatil qardaşının hərəkətinə tab gətirməyib:

"Bu hadisədən sonra ailə üzvlərimizin hərəsi bir qohum evində qalırdı. Atam, anam, bacım, qardaşım – hərə bir yerə getmişdi. O da bu cür vəziyyətə dözmədi, intihar etdi. İnsandır da, ürəyi götürməyib, dözməyib. Atamla onun ölümü arasında 5 dəqiqə fərq oldu".

Baş Prokurorluğun mətbuat xidmətinin rəhbəri Eldar Sultanov isə ANS-ə bildirib ki, hər iki şəxsin meyiti ekspertizaya götürülüb.

Qeyd edək ki, Rafiq Hüseynov qayınanası Diləzbər Məmmədovanın yaşadığı evə gələrək ailə-məişət münaqişəsi zəminində ov tüfəngindən və əl qumbarasından istifadə etməklə 7 nəfəri qətlə yetirmişdi. Daha sonra Rafiq Hüseynov könüllü olaraq Goranboy Rayon Polis Şöbəsinə gəlmiş və hadisəni törədərkən istifadə etdiyi ov tüfəngini təhvil vermişdi.