Dövlət Təhlükəsizliyi Xidmətinin əməkdaşları Azərbaycan Dillər Universitetinin (ADU) tələbələri ilə görüşüblər.

ADU-dan Axar.az-a verilən məlumata görə, görüş zamanı əvvəlcə ümummilli lider Heydər Əliyevin həyat və fəaliyyəti, xalq qarşısındakı xidmətlərindən bəhs edən “Dahi şəxsiyyət” adlı sənədli film nümayiş olunub. Universitetin rektoru, akademik Kamal Abdulla ADU ilə Dövlət Təhlükəsizliyi Xidməti arasında belə görüşlərin mütəmadi keçiriləcəyinə ümidvar olduğunu bildirib:

“Dövlət Təhlükəsizliyi Xidmətinin Ulu Öndərin şəxsiyyətinə bəslədiyi hörmət qəlbimizi qürurlandırır. Çünki ulu öndər Heydər Əliyev də öz fəaliyyətinə məhz bu xidmətin sıralarından başlayıb və onun fəaliyyəti xalqımızın qəlbində yaşayır”.

ADU-nun Azərbaycan dilçiliyi kafedrasının müdiri, professor Adil Babayev ulu öndər Heydər Əliyevin təhlükəsizlik orqanlarında xidmətlərindən danışıb, Ümummilli Liderin fəaliyyətini milli təhlükəsizlik sahəsində yeni mərhələnin başlanğıcı kimi xarakterizə edib.

Dövlət Təhlükəsizliyi Xidmətinin əməkdaşı Rasim Əmiraslanov xüsusi xidmət orqanları anlayışı, müasir dövrdə bəzi qüvvələrin gənclər arasında apardığı yanlış təbliğat haqqında məlumat verib.

Tədbirdə tələbələri maraqlandıran suallar Dövlət Təhlükəsizliyi Xidmətinin əməkdaşları tərəfindən cavablandırılıb.