Gəncənin Hacıkənd qəsəbəsində məskunlaşan Xocalı və Kəlbəcərdən olan məcburi köçkünlər yeni qəsəbəyə köçürüləcək.

Axar.az Kəpəz TV-yə istinadən xəbər verir ki, Gəncənin Hacıkənd qəsəbəsində məskunlaşan Xocalı və Kəlbəcərdən olan məcburi köçkünlər ilin sonuna qədər Kəpəz rayonu ərazisində salınan 600 mənzildən ibarət qəsəbəyə köçürüləcək.

Gəncə şəhər İcra Hakimiyyəti nümayəndələrinin Hacıkənddə məskunlaşan məcburi köçkün ailələri ilə keçirilən görüş zamanı bildirilib ki, qəsəbədə 140 ailənin yeni mənzillə təmin olunması nəzərdə tutulub, onların ev və məişət əşyalarının daşınması üçün dövlət tərəfindən nəqliyyat vasitələri ayrılıb. Məcburi köçkün ailələrinin əksəriyyəti heyvandarlıqla məşğul olduğundan mal-qaranın saxlanması üçün yeni fermanın tikilməsi də planlaşdırılır. Görüşdə yeni qəsəbəyə köçürüləcək sakinlərin işlə təminatına da zəmanət verilib.