Bu gün məhərrəmlik başa çatır.

Axar.az xəbər verir ki, artıq sabahdan paytaxt və bölgələrdə toy mövsümü başlayır. Toy mövsümü başlamaqla ölkədə fəaliyyət göstərən restoranlarda da ciddi yoxlamalara start veriləcək.

Əldə etdiyimiz məlumata görə, sabahdan etibarən Standartlaşdırma, Metrologiya və Patent üzrə Dövlət Komitəsi (SMPDK) ciddi yoxlamalara başlayır. Qəbul olunmuş qaydalara riayət etməyən restoran sahiblərini isə ciddi cəza gözləyir.

Bildirək ki, bəzi restoranlar İqtisadiyyat və Sənaye Nazirliyinin xəbərdarlığına əməl etsələr də, israfçılıq tamamilə yığışdırılmayıb. Qanuna əsasən, istehlakçını keyfiyyətsiz və ya ona lazım olmayan çeşidli mal almağa və xidmət göstərilməsinə məcbur etmək qadağandır. İstehlakçıya hər hansı bir mal və xidmətin satışı digər mal və xidmətin alınması ilə şərtləndirilə bilməz. İstehlakçı satıcının süni surətdə yaratdığı dəstdən ona lazım olan malı almaq hüququna malikdir.

Bu arada SMPDK artıq reydlərə start verib.

Dövlət Komitəsinin sədri Ramiz Həsənovun APA-ya verdiyi məlumata görə, komitə Azərbaycanın regionlarındakı şadlıq saraylarında məhsulun keyfiyyətini yoxlayacaq.

Komitə sədrinin sözlərinə görə, hazırda qurumun əməkdaşları tərəfindən Bakıdakı şadlıq saraylarında məhsulun keyfiyyətinin yoxlanılması ilə bağlı monitorinqlər aparılır.

"Biz bunun üçün müasir standartlara uyğun səyyar maşın almışıq. Bu isə bizə nəinki Bakıdakı, hətta regionlardakı şadlıq saraylarında məhsulun keyfiyyətini yoxlamağa imkan verir. Bu proses mütəmadi olaraq davam etdiriləcək", - deyə R.Həsənov qeyd edib.