Şəmkir rayonunun Çənlibel kəndi ərazisində bir neçə ildir ki, Altay maralları bəslənir. İri buynuzları ilə diqqət çəkən bu marallardan artıq bala da alınıb. Yerli iqlimə uyğunlaşan maralların saxlandığı məkan turistlərin də diqqətini cəlb edib.

Axar.az Xəzər TV-yə istinadla xəbər verir ki, Altay maralları Şəmkirin dəniz səviyyəsindən 1400 metr hündürlükdə yerləşən Çənlibel kəndini özlərinə məskən seçib. Heyvanlar üçün burda 50 hektar ərazi ayrılıb.

Yeni yerlərində maralların yaşaması, qidalanması və xarici amillərdən, xüsusən də yırtıcı heyvanlardan qorunması üçün xüsusi şərait də yaradılıb.

Maralları bəsləyən Elbrus Əliyev deyir ki, onlar olduqca həssas heyvanlardır. Hazırda buynuzlu erkək maralların sayı 5, dişilərin sayı isə 50-dir. Artıq onlar yeni yerlərində nəsil də verib. Altay maralları iqlimə də artıq uyğunlaşıblar. İnsanlar Çənlibelə, maralların məskəninə çevrilən bu dağlıq ərazilərə onları görmək üçün gəlirlər.

Yaxın gələcəkdə bura gələn turistlər üçün hostellər də tikiləcək.