"Azərbaycanın işğal olunmuş torpaqlarında ermənilərin tarixi, dini və mədəni abidələrə qarşı törətdiyi vandalizmi, terrorzimi dünya ictimaiyyətinə çatdırmaq əsas məqsədlərimizdən biridir".

Report-un məlumatına görə bunu Dini Qurumlarla İş üzrə Dövlət Komitəsinin (DQİDK) İnsan Hüquqları İnstitutu ilə birgə keçirdiyi "İşğal altında qalmış abidələrimiz: tarixi yaddaşın izi ilə" adlı konfransda DQİDK sədri Mubariz Qurbanlı bildirib.

"Azərbaycanın xarici diplomatiyasında da bu məsələ öz əksini tapıb. Azərbaycanın hücum diplomatiyası bu istiqamətdə ciddi uğurlar əldə etməkdədir, Heydər Əliyev Fondu da bu istiqamətdə xeyli işlər görür", - o əlavə edib.

M.Qurbanlı qeyd edib ki, işğal olunmuş ərazilərdə ermənilər tərəfindən çoxlu abidələr, məscidlər dağıdılıb: "Onların ümumi sayı 1000-ə yaxındır. Onların içərisində məscidlər, kitabxanalar və mədəniyyət ocaqları var. Bu dağıdılan abidələr içərisində yalnız müsəlman abidələri deyil, eyni zamanda yəhudi və xrisitan alban məbədləri də var. Biz məhz bu məsələləri dünya ictimaiyyətinə çatdırmaq istəyirik".