Çində yayılan və artıq bir neçə ölkəyə keçən koronavirusun qarşısının alınması hələlik mümkün olmasa da, artıq bəzi din xadimləri bununla bağlı qəribə fikirlər səsləndirirlər. Belə ki, Dalay Lama buddistlərə koronavirus epidemiyasını aradan qaldırmaq üçün “Tara mantrası”nı mümkün qədər tez-tez oxumağı tövsiyə edib. Gürcü patriarxı II İlya isə bu virusun imanı gücləndirmək üçün bir sınaq olduğunu adlandıraraq, insanları dua etməyə səsləyib.

Məsələ ilə bağlı Axar.az-a açıqlama verən ilahiyyatçı Elşad Miri bütün bunların cəfəngiyyat olduğunu bildirib:

“Mən bu iddianı biabırçılıq adlandırardım. Allah səmavi kitabları göndərib ki, oxuyub dərk edək. Amma biz onu müalicə məqsədilə oxuyuruq. Guya bunu etməklə nə isə düzələcək. Allah bizim mənəvi olaraq sağalmağımızı istəyir. Yoxsa hansısa formada nəsə oxumaqla heç nə dəyişən deyil.

Bildiyimiz kimi, Dalay Lama buddizmlə əlaqədar olan din xadimlərindən biridir. Guya yuxarılardan külək vurduqca dualar ətrafa yayılır və insanlar o zaman orada həmin duaların təsirindən faydalanırlar. Faktiki olaraq həmin duaların olduğu bir yerdən bu virus yayılırsa, onda belə çıxır ki, elə virus özü dua vasitəsilə yayılır”.

İlahiyyatçının sözlərinə görə, bu düşüncədə olan müsəlman din xadimləri də var:

“Quran ayələrini suya salıb, həmin suyu içirlər, bəziləri üstünə üfürürlər. Bunlar hamısı uydurmadır, yalandır, insanları dinlə aldatmaqdır. Ona görə də elmlə, ağılla bunu araşdırıb, lazımi dərmanı tapıb insanları bu bəladan xilas etmək lazımdır. Bir insan hərəkətə keçməlidir, cəhd etməlidir. İnsan cəhd edir, sonda həmin işin nəticəsini Allaha həvalə edir. Dua əslində budur”.