İslam bankçılığının Azərbaycanda inkişafına təkan vermək üçün qanunvericilikdə dəyişikliklər ediləcək.

Axar.az xəbər verir ki, bu fikri "İslam maliyyəsi: müasir vəziyyət və gələcək gözləntilər" mövzusunda beynəlxalq toplantıda millət vəkilləri səsləndirib. Onların fikrincə, məhz müsəlman qaydalarına uyğun fəaliyyət göstərən bankların ipoteka şərtləri gənc ailələrin köməyinə gələ bilər.

Qeyd edək ki, hazırda islam maliyyəsi 1,3 trilyon ABŞ dolları həcmində dövriyyəyə malikdir. Həmin vəsaitlər dünyanın 75 ölkəsində 400-dən çox maliyyə təşkilatı tərəfindən idarə olunur. Azərbaycanda isə artıq 7-dən çox bank, lizinq, mikrokredit təşkilatı islam maliyyəsindən yararlanır.

Tədbirin məqsədi İslam maliyyə sistemi sahəsində çalışan yerli və xarici alimləri, ictimai xadimləri, investorları və digər maraqlı tərəfləri bir araya toplayaraq onların təkliflərini toplamaq, innovativ fikirləri paylaşmaq, iştirakçıların təmsil olunduqları ölkələr üçün İslam maliyyəsinin tətbiqi sahəsində tövsiyələr hazırlamaqdan ibarətdir.

Toplantıda AMEA–nın İqtisadiyyat İnstitutunun direktoru Nazim İmanov, Türk Əməkdaşlıq və Koordinasiya Agentliyinin (TİKA) Bakı proqram koordinasiya ofisinin koordinatoru Mustafa Haşim Polad və İqtisadi Resursların Öyrənilməsi Mərkəzinin sədri Ruslan Atakişiyev İslam maliyyəsinin tətbiqini genişləndirməyin əhəmiyyətindən danışıblar. Müsəlman ölkələrindən tədbirə qatılan qonaqlar da öz təcrübələrini bölüşüb.