"Maştağa, Nardaran, Zabrat, Sabunçu qəsəbələrindəki enerji problemi aradan qaldırılıb".

Bu sözləri Axar.az-a açıqlamasında "Azərişıq" ASC mətbuat xidmətinin rəhbəri Tanrıverdi Mustafayev deyib. Onun sözlərinə görə, enerjinin fasilələrlə verilməsinə əlverişsiz hava şəraiti səbəb olub:

"Güclü külək nəticəsində "Azərenerji" ASC-yə məxsus Əhmədli yarımstansiyasında dayaq əyilib. Hazırda orada təmir işləri aparılır. Ona görə oradan qidalanan ərazilərdə enerji kəsilib. Hazırda Maştağa, Nardaran, Zabrat, Sabunçu qəsəbələrində problem aradan qaldırılıb".

Qeyd edək ki, Əhmədli yarımstansiyasından Yeni Günəşli, Bülbülə, Binə və Türkan qəsəbələrinin enerji təlabatı ödənilir. Dünən havanın kəskin dəyişməsi ilə paytaxt sakinlərinin elektrik enerjisi və qazla təminatında ciddi problemlər yaranmışdı. Bakının Maştağa, Nardaran, Sabunçu, Zabrat, Əhmədli, Günəşli və digər ətraf qəsəbələri dünəndən işıqsız qalmışdı.