16:58

MSK-nın bu gün keçirilən iclasında 79 saylı İmişli seçki dairəsi üzrə daxil olan şikayəti MSK üzvü Bəxşeyiş Əsgərov çatdırıb.

Axar.az xəbər verir ki, həmin seçki dairəsi üzrə namizəd olmuş İlqar Hüseynli, İltizam Əkbərli və Murad Fərzəliyevin şikayətinə baxılıb.

B.Əsgərov qeyd edib ki, İ.Hüseynli DSK-nın 4 məntəqə üzrə qərarından şikayə verib:

"Daha sonra MSK-ya göndərdiyi şikayətdə məntəqələrin sayı daha çox olub. İltizam Əkbərli də bir sıra məntəqələrdən şikayətini çatdırıb. Videogörüntülər araşdırılarkən 2 məntəqədə seçicilərin iradəsini müəyyən etməyə imkan verməyən hallar müəyyən edilib. Bunlar 14 və 23 saylı məntəqələrdir. Əsas mübahisələndirilən məsələlər protokolların verilməməsidir”.

B.Əsgərov sosial şəbəkələrdə olan məlumatları və namizədlərin təqdim etdikləri görüntüləri araşdırdıqlarını bildirib:

“Bütün bu araşdırmalar nəticəsində ekspert qrupu bu qənaətə gəlib ki, 14, 16, 21, 23 və 25 saylı məntəqələrdə protokollarda seçicilərin iradəsini ifadə etməyə imkan verməyən hallar müəyyən olunub”.

Daha sonra bu məntəqələrdə nəticələr etibarsız sayılıb.

MSK-nın son qərarınadək bu dairədə 20.9 faiz səslə Razi Nurullayev lider idi. Nurullayev topladığı 2705 səslə ikinci yerdə olan Murad Fərzəliyevi (2663 səs) 42 səslə qabaqlayırdı. 14, 16, 21, 23 və 25 saylı məntəqələrin nəticələri ləğv edildikdən sonra R.Nurullayevin 2398 səsi qalmasına baxmayaraq, rəqibi ilə səs fərqini artırıb. Belə ki, məntəqələrin ləğvindən sonra Murad Fərzəliyev 2209 səslə yenə ikinci olub.