Ana səhifə Toplum |
Manatın ucuzlaşmasından sonra Bakıda vəziyyət necədir?
Axar.az-ın müxbiri bu suala cavab axtarmağa çalışıb. Əməkdaşımız şəhərin bəzi ticarət mərkəzlərində, supermarket şəbəkələrində, apteklərində, valyutadəyişmə məntəqələrində müşahidələr aparıb.
Milli məzənnənin delavasiyasından sonra leytmotiv ondan ibarətdir ki, bəzi iaşə obyektlərində sui-istifadə halları mövcuddur. Belə ki, mağazalar milli pulun kursunun dəyişməsindən qabaq alınmış məhsulların qiymətini də bahalaşdırır. Hətta birdəfəlik istifadə üçün nəzərdə tutulan üzqırxan "Jilet"in qiyməti də 5 qəpik qaldırılıb.
Süni qiymət artımı bəzi apteklərdə də müşahidə olunur. Reportyorumuza bildirilib ki, əvvəldən satışda olan dərmanların qiyməti qalxıb. Firmalardan isə yeni mal gətirilməyib ki, qiymət bahalaşa, sadəcə, süni artımına yol verilib.
Valyutadəyişmə məntəqələrinə gəlincə, dollar alışı və satışı bəzi yerlərdə bərpa olunub. Ümumilikdə isə bu məntəqələrdə məzənnə elanı olan lövhələr götürülüb. Bu da yeni məzənnə lövhəsini asmaq üçün nəzərdə tutulub.
Qəribədir ki, taksi sürücüləri də qiymət artımı küyünə düşüb, gedişhaqlarını bahalaşdırıblar. Xüsusilə şəhərlərarası taksi xidməti göstərən sürücülər müxtəlif bəhanələrlə qiyməti qaldırmağa cəhd edirlər.
Kafe-restoranlarda isə ciddi dəyişiklik müşahidə edilmir. Müxbirimizə o da deyilib ki, tikinti materialları nisbətən bahalaşıb.
Qeyd edək ki, İqtisadiyyat və Sənaye Nazirliyi yanında Anti-inhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən davamlı montorinqlər keçirilir və sui-istifadə hallarının qarşısı alınır.
Tarix
2015.02.23 / 23:54
|
Müəllif
Emin Aslanlı
|