Koronavirusa yoluxanların sayında müşahidə olunan azalmadan dolayı arxayın olmaq üçün hələ tezdir. Çünki bu infeksiya hava-damcı yolu ilə yayılır. Belə infeksiyalardan hər cür təlatüm gözləmək olar.

Axar.az xəbər verir ki, bu sözləri Baş infeksionist Cəlal İsayev Real TV-yə açıqlamasında bildirib.

İnfeksionistin sözlərinə görə, karantin rejiminin uzadılması vacibdir:

“Karantin rejiminin tətbiqindən əvvəlki dövrdə virusa yoluxanlar var. Yəni cəmiyyətdə hələ də virusu ifraz edən insanlar ola bilər. Biz onların azad hərəkətinə icazə versək, digər insanların yoluxmasına səbəb ola bilərik. Ona görə də arxayınlaşmaq olmaz. Hesab edirəm ki, karantin rejiminin bir qədər də uzadılmasına ehtiyac var. Tam əmin olduqdan sonra mərhələli şəkildə karantinin yumşaldılmasına imkan yarana bilər. İndidən başlasaq, fikrimcə, səhv etmiş olarıq. Karantin rejimini uzatmaq vacibdir".