Xəstə 22 may tarixində şiddətli ağrı və qanaxma, çəki itirmə şikayəti ilə xəstəxanaya gəldi. May ayında müxtəlif xəstəxanalara müraciət edib, qarın boşluğu, ağciyərdə müxtəlif damar genişlənməsi müşahidə olunub.

Axar.az xəbər verir ki, bunu “Bona Dea” Beynəlxalq Hospitalın onkoloqu Altay Əliyev 22 yaşlı qız Təbəssüm Məmmədovanın meyitinin ailəsinə pula görə təhvil verilməməsi ilə bağlı məsələ ətrafında keçirilən mətbuat konfransında deyib.

"Biz xəstəyə müvafiq prosedurları izah etdik, biopsiya etdik. Xəstənin vəziyyəti ağır idi. Onkologiyada "təcili xilasetmə" dediyimiz müalicə ilə xilas etmək faizi çox aşağıdır. Bu müddətdə xəstə yaxınlarına müvafiq bilgilər verildi. Avropa xəstəxanaları ilə görüşlər aparıldı və ortaq nəticə ilə kimyaterapiya tətbiq olundu. Lakin xəstədə qanaxma davam etdi", - o bildirib.

A.Əliyev qeyd edib ki, qanaxmaya rəğmən müəyyən müsbət nəticələr də əldə olundu:

"Buna baxmayaraq, 22 gün sonra xəstəni itirdik. Belə xəstələrin xilas olma ehtimalı 29 faiz olsa da, bu, kifayət qədər böyük rəqəmdir. Tibb elmində xəstə üçün əlindən gələni etməlisən. Ailənin bu cür dərdinin cəmiyyətə fərqli şəkildə çatdırılması həkimlərin xəstə seçməsinə şərait yaradacaq. Həkimlər ittihamlardan çəkinərək, xəstənin ölümünə səbəb olacaqlar".