Ermənistan həyasız və qəddarcasına dinc Azərbaycan əhalisinin soyqırımını həyata keçirir.

Bu barədə Axar.az-a açıqlamasında RK-nın ictimai xadimi, Qazaxıstan Jurnalistlər Birliyinin üzvü Nəsiha Qumarqızı söyləyib.

“Azərbaycanın azadlıq müharibəsinin bu çətin günlərində mən bir Qazaxıstan vətəndaşı kimi, ana, nənə, sadə bir türk qadını olaraq susa bilmərəm. 1992-ci il Xocalı soyqırımı, 2017-ci ildə Füzuli bölgəsindəki mülki əhalinin atəşə tutulması nəticəsində kiçik Zəhranın ölümü gözümüzün önündə canlanır.

İndi isə Gəncə və Bərdədə öz evlərində dinc yatan qadınların, qocaların və uşaqların ballistik raketlə vəhşicəsinə atəşə tutulması nəticəsində bu cür qəddarcasına həlak olması... Teymur Xalıqovun ermənilərin Gəncəni atəşə tutduğu gecə (oktyabrın 17-dən 18-nə keçən gecə) həlak olmuş 10 aylıq körpəsi – Narinin cansız bədənini daşıdığı fotoya baxmaq mümkün deyil. Bu, həyasız və qəddar terrorizmdir, dinc Azərbaycan əhalisinin soyqırımıdır", - deyə o bildirib.

N.Qumarqızı Azərbaycanın maddi dəstəyə və silah təchizatına ehtiyacı olmadığını da vurğulayıb:

“Azərbaycan güclü ölkədir! Onun təchiz olunmuş, kənar yardım və müdaxiləyə ehtiyac duymayan ordusu var. Atalar sözündə əbəs yerə “dost dar gündə tanınar” deyilməyib. Qazaxıstan heç vaxt Azərbaycana qarşı olmayacaq. Bunun sübutu güclü türk köklərimiz, ortaq Dədə Qorqud irsimiz, dostluğumuz və həmrəyliyimiz, iqtisadi münasibətlərimiz, eləcə də Qazaxıstan Prezidenti K.Tokayevin Azərbaycana dəstəyini və həmrəyliyini ifadə etdiyi rəsmi açıqlamasıdır”.