Bütöv Azərbaycan Xalq Cəbhəsi Partiyası (BAXCP) Azərbaycan Respublikası Prezidentinin Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi zəfərin nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə Bakı şəhərində Vətən müharibəsi memorial kompleksinin və Zəfər muzeyinin yaradılması haqqında sərəncamını alqışlayır.

Axar.az xəbər verir ki, bu barədə partiyanın Prezident İlham Əliyevin sözügedən sərəncamı ilə bağlı yaydığı açıqlamada qeyd olunub.

BAXCP bəyan edir ki, Vətən müharibəsində misilisiz qəhrəmanlıqlar nümayiş etdirən, Azərbaycan torpaqlarının işğaldan azad edilməsi uğrunda canlarını fəda edən şəhidlərin xatirəsi əbədiyyətə qədər ürəklərdə, yaddaşlarda yaşayacaq, onların adları qürur və and yerimizə çevriləcək.

BAXCP-nin açıqlamasında Vətən müharibəsi memorial kompleksi ilə bağlı təkliflər də yer alıb. Partiya hesab edir ki, memorial kompleksdə Azərbaycan-Türkiyə qardaşlığını ifadə edən xüsusi guşə yaradılmalı, bütün şəhidlərimizin adı memorial kompleksdə öz əksini tapmalıdır:

“Ümid edirik ki, Vətən müharibəsi memorial kompleksi və Zəfər muzeyi xalqımızın döyüş ruhunu, Vətən sevgisini, milli həmrəyliyimizi, dövlətimizin, ordumuzun əzəmətini nümayiş etdirən memarlıq abidəsi kimi əsrlər boyu yaşayacaq, Azərbaycanın bütövlüyünü və bölünməzliyini simvolizə edəcəkdir”.