Mart ayından etibarən dövlət yoxlanışı məqsədi ilə açılaraq götürülən qaz sayğaclarının yerinə quraşdırılacaq smart-kart (əvvəlcədən ödənişli) sayğaclardan istifadə edəcək abonentlərə yeni imkanlar yaradılacaq.

Bu barədə Axar.az-a "Azəriqaz" İstehsalat Birliyindən məlumat verilib. Bildirilib ki, mart ayından yeni quraşdırılacaq smart-sayğaclarda 20 kubmetr həcmində kredit almaq mümkün olacaq.

Bu günə qədər istifadədə olan smart qaz sayğaclarında bu həcm 10 kubmetrə bərabər idi. Abonentlər bəzən qaz sayğacında qaz həcmi bitdiyi zaman növbəti dəfə kartın balansını artırana qədər müvəqqəti olaraq məhz bu kredit qaz həcmi hesabına ehtiyaclarını ödəyir.

Həm sosial şəbəkə, həm də ümumi müraciətləri nəzərə alaraq “Azəriqaz” İstehsalat Birliyi gələn aydan etibarən istismara veriləcək əvvəlcədən ödənişli qaz sayğaclarında bu imkanın proqramlaşdırılmasına qərar verib.