Ana səhifə Toplum |
İkimərtəbəli, Wi-Fi ilə tam təchiz olunan, nəzarət
kameraları quraşdırılan yeni sürət qatarları artıq Bakıdadır.
"Azərbaycan Dəmir Yolları" QSC tərəfindən Minskin "Stadler"
zavodundan alınan 5 sürət qatarından ikisi artıq Bakıya gətirilib
və istifadəyə tam hazırdır. Qalan qatarların çatdırılması isə bu
ilin sonunadək gözlənilir.
"Azərbaycan Dəmir Yolları" QSC-nin mətbuat xidmətinin rəhbəri Nadir
Əzməmmədov APA-ya bildirib ki, ilkin mərhələdə I Avropa Oyunlarının
keçirilməsi zamanı qatarlar Bakı Dəmiryol Vağzalından Bakı
Metropoliteninin "Koroğlu" stansiyasınadək marşrut üzrə hərəkət
edəcək. Daha sonra onlar Bakı-Sumqayıt marşrutu üzrə xidmət
göstərəcək.
"Bakı-Sumqayıt-Bakı dairəvi dəmir yolu iki hissəyə bölünməklə
yenidən qurulur. Birinci hissəyə daxil olan Bakı-Biləcəri-Sumqayıt
xətti 42, ikinci - Bakı-Zabrat-Sumqayıt xətti isə 49 kilometrdir.
Yolun 55 kilometrdən çox hissəsində yenidənqurma işləri artıq başa
çatdırılıb. Daha sonra qatar Bakı-Sumqayıt marşrutu üzrə xidmət
göstərəcək" - deyə Nadir Əzməmmədov qeyd edib.
Yeni texnologiyaların tətbiqi istehsal zamanı yeni qatarlara da
şamil olunub. Bu səbəbdən yeni qatarların idarəetmə mexanizmi köhnə
nəsil qatarlardan fərqlənir. Bəs bu fərqlər nədən ibarətdir? Yeni
qatarların idarə etmə prosesini maşinistlər nə dərəcə də
öyrənib?
Bütün bu suallara maşinist Mais Məmmədov cavab verdi: "Bu
qatarların özləri bizim üçün yenidir. Yeni qatarlar köhnələrdən
tamamilə fərqlidir. Burada avtomatlaşdırılmış sürət sistemi
qurulub. Yəni sürəti tam olaraq tənzimlənir. Bununla yanaşı,
qarşıda olan hər hansı maneəni və qatarın özündə olan nasazlıq
kompüterlər vasitəsilə bizi xəbərdar edir, dərhal həmin nasazlıq
aradan qaldırılır".
Mais Məmmədov deyir ki, bir neçə ay öncə onlar Minskdə xüsusi kurs
keçərək yeni sistemi tam öyrəniblər.
İkimərtəbəli qatarlar 919 sərnişin üçün nəzərdə tutulub. Burada 396
oturacaq quraşdırılıb. Yeni qatarda əlillərin rahat hərəkət edə
bilməsi üçün xüsusi lift quraşdırılıb. Burada onlar üçün ayrıca
oturacaqlar da təşkil edilib.
Yeni qatarlarda gediş haqqının qiymətinə gəlincə, idarədən bildirib
ki, tariflər o qədər də yüksək olmayacaq və bu məsələdə əhalinin
sosial vəziyyəti nəzərə alınacaq. Qiymətlər Tarif Şurası tərəfindən
müəyyənləşdirilir və hazırda İdarə tərəfindən yeni təkliflər
hazırlanır.
Tarix
2015.06.04 / 22:22
|
Müəllif
Axar.az
|