Neftçilərin Hüquqlarının Müdafiəsi Təşkilatının sədri ölkəyə xaricdən ucuz işçi qüvvəsi gətirən şirkətlərin adlarını açıqlayıb.

Axar.az xəbər verir ki, bu barədə QHT sədri Mirvari Qəhrəmanlı Feysbuk hesabından məlumat paylaşıb. M.Qəhrəmanlının fikrincə, xaricdən ucuz işçi qüvvəsi gətirən şirkətlər ölkədə süni şəkildə işsizlik problem yaradır:

"Neftçilərin Hüquqlarının Müdafisi Təşkilatı olaraq ölkədə neft sənayesində gedən ixtisarlarla əlaqədar vaxtaşırı narahatçılığımızı bildiririk. Bu ixtisarların nəticəsində çoxlu sayda insan işsiz qalır və təbii ki, bu da ölkədə işsizliyin artmasına səbəb olur. Ancaq belə bir şəraitdə, ölkəyə xaricdən (əsasən də Hindistandan) işçi qüvvəsinin gətirilməsinin səbəbi nədir? Təşkilatımıza daxil olan məlumata görə, belə şirkətlərdən "Caspian Shipyard Company", "Elite Marine PTE" LTD və s. göstərmək olar. Daha bir şirkət isə bu prosesin hazırlığı (xaricdən işçi gətirilməsi) mərhələsindədir. Biz Neftçilərin Hüquqlarının Müdafiəsi Təşkilatı olaraq narahatçılığımızı bildiririk. Ümid edirik ki, bu sahəyə məsul müvafiq dövlət qurumları prosesi nəzarətə götürəcəklər".