Gəncədə "QHT-lərə dövlət dəstəyi: Qarşıda duran vəzifələr və yeni yanaşmalar" mövzusunda konfrans keçirilib.

Axar.az xəbər verir ki, tədbirdə ölkənin 53 rayonunu təmsil edən QHT sədrləri, QHT-lərin regional koordinasiya mərkəzlərinin rəhbərləri iştirak edib.

Prezident yanında Qeyri-Hökumət Təşkilatlarına Dövlət Dəstəyi Şurasının Şərq-Qərb İdarəetmə İnstitutunun Sosial-İqtisadi İnkişaf Fəaliyyəti (SEDA) layihəsi ilə birgə təşkil etdiyi toplantıda regional vətəndaş cəmiyyəti şəbəkəsi müzakirə olunub.

Bölgələrdəki QHT-lərin resurs və təlim mərkəzlərinin "Baş Plan"ın hazırlanması, onların inkişafı üçün qarşıda duran vəzifələr, yeni yanaşmalar və gələcək əməkdaşlıq perspektivləri, QHT qanunvericiliyinə edilən dəyişikliklər və onların tətbiqi məsələləri mövzularında məruzələr dinlənilib.

Konfransda Şura üzvləri Rəna Mirzəzadə, Vüqar Qədirov, MQF prezidenti Rauf Zeyni, "Sosial Tərəqi" İctimai Birliyinin sədri Qalib Nəbiyev, Sosial-İqtisadi İnkişaf Fəaliyyəti layihəsinin ölkə üzrə direktor müavini Vaqif Həsənov və Gəncə şəhər İcra Hakimiyyətinin şöbə müdiri Həsən Məmmədov çıxış ediblər.

Çıxışlar zamanı dövlət qurumları ilə vətəndaş cəmiyyəti institutları arasında dialoq mühiti, yerli və mərkəzi icra hakimiyyəti orqanları ilə əməkdaşlıq çərçivəsində həyata keçirilən layihələrin əhəmiyyəti haqda iştirakçılara geniş məlumat verilib.