Azəryolservis ASC tərəfindən Bakı-Sumqayıt yolunun bağlanması və orada təmir işlərinin aparılması ilə bağlı qərar verilməyib.

Axar.az xəbər verir ki, bu sözləri "SalamNews"a Azəryolservis ASC-nin mətbuat xidmətinin rəhbəri Anar Nəcəfli sözügedən yolun bağlanması haqda yayılan məlumata münasibət bildirərkən deyib.

A.Nəcəflinin sözlərinə görə, Bakı-Sumqayıt yolu bağlanmayacaq:

"Bakı-Sumqayıt yolunun Bakı Beynəlxalq Avtovağzalına yaxın ərazidə istinad divarlarının bərkidilməsi ilə bağlı təmir işləri aparılıb. Bu səbəbdən Bakı-Sumqayıt yolunun bağlanması haqda yayılan məlumatlar yayılıb. Ancaq deyilənlər həqiqəti əks etdirmir. Hələ ki, Azəryolservis ASC tərəfindən yolun bağlanması və orada təmir işlərinin aparılması ilə bağlı qərar verilməyib".

Xatırladaq ki, Bakı-Sumqayıt yolunun Bakı Beynəlxalq Avtovağzal ərazisi yaxınlığındakı yolda çökmə baş verib.