Türkiyənin Antalya şəhərində Azərbaycan əsilli iş adamı Telman İsmayılovun tikdirdiyi "Mardan Palace" otelinin yeni sahibi "Halk Bank" olub.

Report xəbər verir ki, otel 719 mln. türk lirəsinə satışa çıxarılsa da, Türkiyə Bankı onu 360,05 mln. lirəyə (təxminən 253 mln. ABŞ dolları) alıb.

Qeyd edək ki, hərracda yalnız "Halk Bank" iştirak edib və o, "Qaranti Bank"ın almalı olduğu 207 mln. lirə (təxminən 73 mln. dollar) borcu bu bankın hesabına köçürəcək. Otelin dəyərinin qalan 151,95 mln. lirə (təxminən 53,5 mln. dollar) olan hissəsi isə "Halk Bank"a borc olduğu üçün ödənilməyəcək.

Xatırladaq ki, "Mardan Palace"ın əsas binasının dəyəri 234 mln. dollar, ətrafındakı villalar isə 25 mln. dollar dəyərində qiymətləndirilir. Otelin "Qaranti Bank"ına 73 mln. dollar, "Halk Bank"a isə 21,6 mln. dollar borcu olub.

Qeyd edək ki, "Mardan Palace" 2009-cu il mayın 23-dən fəaliyyət göstərir.