ANS televiziyasında Xoşqədəm Baxşəliyevanın aparıcısı olduğu "Deməsək olmaz" verilişi bir-biri ilə silsilə təşkil etmir. Ancaq "Sən tək deyilsən" və "Xoşqədəmlə axtarıram səni" verilişləri bir-biri ilə silsilə təşkil edirdi.

Milli Televiziya və Radio Şurasından APA-ya bildirilib:

"Xoşqədəmlə axtarıram səni" verilişində itkin düşmüş şəxslər axtarılırdısa, "Sən tək deyilsən" verilişində sosial problemlər, ailə-məişət səviyyəsində, gəlin-qaynana, ər-arvad problemləri müzakirə olunurdusa, "Deməsək olmaz" verilişində konkret mövzu qoyulur və o mövzu ətrafında müzakirələr aparılır. Məsələn, onkoloji xəstəliklər müzakirə olunur. Ekspertlər, mütəxəssislər dəvət olunur. Artıq növbəti verilişdə başqa mövzu müzakirəyə çıxarılır. Təbii ki, "Deməsək olmaz" Xoşqədəm Baxşəliyevanın aparıcısı olduğu əvvəlki verilişlərdən fərqlənir".

Qeyd olunub ki, MTRŞ-nın Ekspertiza, Proqramlaşdırma və Analitik şöbəsi "Deməsək olmaz" verilişində neqativ hal aşkarlamayıb.