Ana səhifə Toplum |
Həqiqətən bu gün ən böyük problemlərdən biri də istilik enerjisi təchizatına payız-qış mövsümünə nəzərdə tutulmuş vaxtda başlaya bilməməkdir.
Axar.az xəbər verir ki, bunu Azəristiliktəchizat ASC-nin sədr müavini İlham Mirzəliyev deyib.
ASC rəsmisi APA-ya geniş müsahibəsində bildirib ki, noyabrın 15-dən qazanxanalar işə salınır: "İstehlak edilən təbii qaza görə borclar tam ödənmədiyi üçün Azəriqaz İstehsalat Birliyi tərəfindən qazanxanaların qaz təchizatının dayandırılması haqqında göstəriş verilir.
Təbii olaraq, biz dərhal müzakirələrə başladıq və bildirdik ki, məsələnin bu cür qoyuluşunu məqbul hesab etmirik. Çünki həm "Azəriqaz", həm "Azəristiliktəchizat" bu dövlətin qurumlarıdır və aramızda olan problemlərin vətəndaşa yansıması düzgün deyil".
İ.Mirzəliyevin fikrincə, bununla bağlı Nazirlər Kabinetinə, Maliyyə Nazirliyinə və ya ən pis halda məhkəməyə müraciət olunmalı idi: "Bir az da uzağa getsək, bu cür məsələlərdə məhkəmədən öncə tərəflər arasında ilkin danışıqlar olmalıdır, yəni tərəflər mübahisəni məhkəməyə qədər həll etməkdə maraqlı olmalıdırlar.
Xəbərdarlıq məktubları olub, lakin zəruri müzakirələr aparılmayıb. Təbii ki, mən özümüzü tərifləyib, günahı "Azəriqaz"ın üzərinə yıxmaq istəmirəm. Çünki onlar öz borclarını tələb etməkdə haqlıdırlar. Amma borc məsələsinə iki cür yanaşmaq olar: "Azəriqaz" borcunu tələb etməkdə haqlıdır, digər tərəfdən qazanxanaların qaz təchizatını dayandıraraq borcu tələb etmək doğru deyil.
Bu gün bizim müəssisənin zərərlə işləməsinin səbəblərindən biri mövcud tariflərin xərclərimizi bağlaya bilməməsidir. Heç kəsə sirr deyil ki, biz soyuq suyun 1 kubmetrini 1 manata alırıq, amma istehsal olunan isti su 40 qəpiyə satılır".
ASC-nin sədr müavini digər səbəbi də açıqlayıb: "Büdcədən maliyyələşdirilən təşkilatların, o cümlədən təhsil, səhiyyə ocaqları, körpələr evi, qocalaq evi və sair istilik haqlarının ödənməsi üçün müəyyən edilmiş limitləri faktiki tələbatın 50-52 faizini təşkil edir.
Başqa sözlə, büdcədən maliyyələşdirilən təşkilatlar faktiki olaraq istehlak etdikləri istilik enerjisinin dəyərinin yalnız yarısını ödəyirlər. Biz etiraf edirik ki, borcumuz var. Amma "Azəristiliktəchizat"ın fəaliyyəti dövründə yaranmış borcun da dəqiqləşdirilməsinə zərurət var".
Tarix
2015.11.26 / 12:54
|
Müəllif
Emil Salamoğlu
|